آخر کب تک؟ ۔۔۔ امجد علی راجا

ہند و پاک اور کشمیر کے مسائل کسے متعلق ایک نیا نظریہ

آخر کب تک؟

ڈرامہ

مصنف:

امجد علی راجا

ڈاؤن لوڈ کریں

پی ڈی ایف فائل
ورڈ فائل
ٹیکسٹ فائل
ای پب فائل
کنڈل فائل

مکمل کتاب پڑھیں …..

آخر کب تک؟

ڈرامہ

امجد علی راجا

ڈرامہ کا مقصد

اس کہانی کا مقصد انٹرنیشنل کمیونیٹی اور ہیومن رائیٹس کی توجہ پاکستانی، ہندوستانی اور کشمیری قوموں کی حالتِ زار کی طرف مبذول کرانا ہے، پاکستان اور ہندوستان کی عوام کو یہ شعور دینا ہے کہ پاک ہند دشمنی دونوں ممالک کی عوام کی خوشحالی اور ملکی ترقی کی راہ میں ایک بڑی رکاوٹ ہے۔

اپنے اقتدار اور بالا دستی کی بقا کی غرض سے دونوں قوموں کو ترقی اور خوشحالی سے دور رکھنے کے لئے اس دشمنی کو نہ صرف بھرپور طریقے سے استعمال کیا جاتا رہا ہے بلکہ اس دشمنی کو استحکام دینے کے لئے مظلوم کشمیری قوم کو تختۂ مشق بنایا گیا ہے۔

اگر دونوں ممالک کی عوام کو اپنی فلاح و بہبود، خوشحالی اور ترقی عزیز ہے تو انہیں اپنی اپنی حکومتوں کو مسئلۂ کشمیر کے حل کی طرف دھکیلنا ہوگا تاکہ پاک ہند دشمنی کی سب سے اہم وجہ کو ختم کیا جا سکے۔ اس مقصد کے "تین قومی نظریہ” پیش کیا جا رہا ہے۔

کہانی کے کردار

جج ’’انسانی عدالت‘‘ کا جج، جس کی عمر 50 سے 60 سال ہے۔ سنجیدہ مزاج، بات کو بغور سننے والا اور بات کی گہرائی تک پہنچنے والا لیکن اس کے چہرے کے تأثرات سے معلوم ہی نہیں پڑتا کہ اسے کون سی بات ٹھیک لگ رہی ہے اور کون سی غلط۔

وکیل 25 سے 30 سال کی خاتون جو ہیومن رائیٹس کی حیثیت سے عدالت میں 3 قوموں کا مقدمہ پیش کرتی ہے اور انہیں حقائق سے آگاہ کر کے نہ صرف ان کی آنکھیں کھولتی ہے بلکہ ان کے حقوق کی جنگ بھی لڑتی ہے۔

پاکستانی 30 سے 40 سال کی عمر کا مرد جو بطور پاکستانی قوم عدالت میں پیش ہوتا ہے۔ تقسیمِ ہندوستان کے بعد ہونے والے خون ریز واقعات کی وجہ سے ہندوستانی قوم سے نفرت اس کے ایمان کا حصہ بن چکی ہے اور اس نفرت کو قائم رکھنا اپنی مذہبی، اخلاقی اور قانونی ذمہ داری سمجھتا ہے۔

ہندوستانی 30 سے 40 سال کی عمر کا مرد جو بطور ہندوستانی قوم عدالت میں پیش ہوتا ہے۔ تقسیمِ ہندوستان اور اس کے نتیجے میں ہونے والے خون ریز واقعات کا ذمہ دار صرف اور صرف پاکستانی قوم کو مانتا ہے اس لئے پاکستانی قوم سے نفرت اس کی رگ رگ میں دوڑتی ہے۔
پاکستانی وزیر 40 سے 45 سال کی عمر کا مرد جو بطور پاکستانی حکومت عدالت میں پیش ہوتا ہے۔ ہندوستانی نیتاؤں کی طرح یہ بھی اپنے ذاتی مفادات کی خاطر عوام کو قربان کرنے کا عادی ہے اور پاکستانی قوم کو بے وقوف بنانے کے لئے پاکستان ہندوستان دشمنی کو استعمال کرتا ہے۔

ہندوستانی منتری 40 سے 45 سال کی عمر کا سانولے رنگ کا مرد جو بطور ہندوستانی حکومت عدالت میں پیش ہوتا ہے۔ اپنی سیاسی ساکھ اور حکومت بچانے کی خاطر عوام کی فلاح و بہبود کی بجائے انہیں مذہبی، معاشی معاملات اور پاکستان سے دشمنی میں الجھائے رکھتا ہے۔

مولوی صاحب جعلی مسلمان مولوی۔ جو دینِ اسلام کی گہرائی کو سمجھنے سے قاصر ہے۔ مسلمانوں کو اسلام کی روح سے دور رکھ کر فرقہ واریت کے ساتھ ساتھ ہندو پاک دشمنی کو فروغ دیتا ہے تا کہ اس کی دکان چلتی رہے۔
پنڈت ہندو دھرم کا جعلی پیشوا۔ جو مذہب کے نام پر اپنی دکان سجائے بیٹھا ہے اور ہندوستانی سیاستدانوں کے مفاد کے لئے کام کرتا ہے۔

پاکستانی فوجی بطور پاکستانی فوج۔ مضبوط اور توانا جسم، با رعب چہرہ، تلوار جیسی مونچھیں۔ ہندوستانی فوج کو دیکھتے ہیں گردن میں اکڑ آ جاتی ہے اور سینہ چوڑا ہو جاتا ہے۔ ملک کی حفاظت کے لئے جان دینے اور لینے کو ہر وقت تیار اور قوم کی حفاظت کے لئے حکومت تک سے ٹکرانے کا حوصلہ۔
ہندوستانی فوجی 40 سے 50 سال کی عمر کا مرد بطور ہندوستانی فوج۔ گردن میں تناؤ، با رعب چہرہ، مضبوط جسم لیکن کشمیری مسلمانوں پر ظلم و ستم کر کر کے اس کے چہرے سے نحوست ٹپک رہی ہے۔ چہرہ ہر وقت کرخت رہتا ہے لیکن جب کشمیر سے با عزت طریقے سے جانے کی صورت نظر آتی ہے تو چہرے کے تأثرات بدل جاتے ہیں۔

کشمیر زیرِ انتظام ہند، بطور کشمیری قوم جو ہندوستان کے زیرِ انتظام کشمیر میں رہتے ہیں۔ ہندوستانی فوج کے ظلم و ستم سے پریشان قوم، جو کم وسائل کے باوجود اپنی قوم کو ہندوستان کے تسلط سے آزاد کرانے کی جد و جہد میں لگے ہوئے ہیں۔

کشمیر زیر انتظام پاک، بطور کشمیری قوم جو پاکستان کے زیرِ انتظام کشمیر میں رہتے ہیں۔

پنڈت کا چیلا ہر وقت پنڈت کے سامنے ہاتھ جوڑے کھڑا رہتا ہے، جہاں پنڈت بیٹھا ہو وہاں زمین پر بیٹھ جاتا ہے۔ عدالت میں پنڈت کی کرسی کے پیچھے والی کرسی پر بیٹھا رہتا ہے۔

مولوی کا مرید ۔ جو ہمہ وقت خدمت میں حاضر رہتا ہے۔ مولوی صاحب کے خلاف کوئی بات برداشت نہیں کرتا۔ عدالت میں مولوی کی کرسی کے پیچھے والی کرسی پر بیٹھا رہتا ہے۔

دربان عدالت کا انتظامی عملہ جس کا کام آواز لگا کر جج کے آنے جانے کی اطلاع دینا اور ملزمان کو حاضر کرنا ہے۔

[منظر: ’’انسانی عدالت‘‘ کا منظر۔ جج کی کرسی کے پیچھے "انسانی عدالت” لکھا ہوا ہے۔ ساتھ ہی دنیا کے بیشتر ممالک کے جھنڈے آویزاں ہیں۔

سامنے عوام کے بیٹھنے کی جگہ پر ایک طرف بوسیدہ لیکن صاف کپڑوں میں ملبوس پریشان حال پاکستانی بیٹھا ہے جس کے ساتھ ایک سیاسی رہنما، ایک مولوی اور ایک اعلیٰ فوجی افسر بیٹھے ہیں۔ دوسری جانب ایک پریشان حال ہندوستانی پرانے لیکن صاف کپڑوں میں بیٹھا ہے، جس کے ساتھ ایک منتری، ایک پنڈت اور ایک اعلیٰ فوجی افسر بیٹھے ہیں۔

وکلاء کی دو میزوں کی بجائے ایک ہی میز رکھی ہوئی ہے جس پر ایک ہی وکیل بیٹھی ہے۔

جج کمرۂ عدالت میں داخل ہوتا ہے۔

All Rise کی آواز کے ساتھ سب کھڑے ہو جاتے ہیں۔ جج اپنی کرسی پر بیٹھ کر نظر کا چشمہ لگاتے ہوئے سامنے پڑی فائل کھولتا ہے اور چند سطور پڑھنے کے بعد اپنا چشمہ اتار کر فائل کے اوپر ہی رکھ دیتا ہے۔]

جج: عدالت کی کاروائی شروع کی جائے۔

وکیل ہیومن رائیٹس آگے بڑھ کر عدالت کے روبرو کھڑی ہو جاتی ہے۔

ہیومن رائیٹس: انسان، قدرت کی سب سے خوبصورت تخلیق ہے اور سب سے عجیب بھی، جو قدرت کے لئے کبھی فخر کا باعث بنتا ہے تو کبھی افسوس کا۔ یہ خود حاکم بھی ہے محکوم بھی، یہ خود ظالم بھی ہے مظلوم بھی، یہ خود جہالت بھی ہے شعور بھی، یہ خود تاریکی بھی ہے اور نور بھی۔

(جج صاحب پوری توجہ سے ہیومن رائیٹس کی باتیں سن رہا ہے)

میری ہمیشہ یہی کوشش رہی ہے کہ انسان کی فلاح و بہبود کے راستے کی ہر رکاوٹ کو نہ صرف منظرِ عام پر لایا جائے بلکہ اس کے خاطرخواہ حل کی بھرپور کوشش بھی کی جائے۔

جج: ہیومن رائیٹس، عدالت آپ کی بیش قیمت خدمات کا اعتراف کرتی ہے اور آپ کے جذبے کی قدر کرتی ہے۔

ہیومن رائیٹس: میں انسانی عدالت کی شکرگزار ہوں۔ آج میں دو ایسی اقوام کو عدالت کے روبرو پیش کرنے کی اجازت چاہتی ہوں جو بیک وقت ظالم بھی ہیں اور مظلوم بھی۔

جج: اجازت ہے۔

دربان: پاکستانی قوم اور ہندوستانی قوم حاضر ہو۔

پاکستانی اور ہندوستانی اپنی اپنی جگہ سے اٹھتے ہیں، گھبرائے ہوئے، ہچکچاتے ہوئے . ہندوستانی قوم کو منتری، پنڈت اور فوجی افسر کھڑے ہو کر حوصلہ دیتے ہیں۔

منتری: ڈرنا مت، پوری ہندوستانی قوم تمہارے ساتھ ہے۔ بس ایک بات یاد رکھنا سامنے پاکستانی قوم ہے، تمہاری دشمن، جس کا مقصد دنیا سے تمہارا نام و نشان مٹا دینا ہے۔

پنڈت: یاد رکھنا ہم ہندو دھرم کے رکشک ہیں، اور یہ پاکستانی قوم ہندو دھرم کی سب سے بڑی دشمن، اسے موقع ملے تو یہ ہندوستان کے ساتھ ساتھ ہندو دھرم کا بھی سروناش کر دے۔ دکھا دو آج اس مسلمان قوم کو کہ ہندو قوم اپنے دھرم کی رکشا کرنا جانتی ہے۔

(ہندوستانی قوم پنڈت کے پاؤں چھو کر آشیرواد لیتا ہے اور کٹہرے کی طرف بڑھ جاتا ہے)

(دوسری جانب پاکستانی قوم کو وزیر، مولوی اور فوجی کھڑے ہو کر حوصلہ دیتے ہیں)

وزیر: دشمن کی آنکھوں میں آنکھیں ڈال کر بات کرنا، اسے معلوم ہونا چاہیئے کہ وہ ایک غیرت مند قوم سے بات کر رہا ہے۔ ڈرنا مت، پوری قوم تمہارے ساتھ ہے۔

مولوی: (کندھے پر ہاتھ رکھ کر پھونک مارتا ہے) میری مسلمان قوم، تمہارے لئے بہت خوش نصیبی کی بات ہے کہ آج ہندوستانی قوم تمہارے سامنے ہے، اللہ اور اس کے رسول صلی اللہ علیہ و آلہ و سلم کی رضا کے لئے مٹا دو اس قوم کو صفحۂ ہستی سے اور بن جاؤ جنت کی حقدار۔ جاؤ میری مسلمان قوم، تمہیں جنت کی بشارت ہے۔

(پاکستانی قوم اور ہندوستانی قوم ایک دوسرے کو نفرت بھری نظروں سے گھورتے ہوئے آمنے سامنے کے کٹہرے میں کھڑے ہو جاتے ہیں)

ہندوستانی: گھور کیا رہا بے۔ آنکھیں نکال کر کتوں کو ڈال دوں گا۔

(ہندوستانی فوجی، منتری اور پنڈت اسے فخر سے دیکھتے ہیں اور مسکراتے ہیں)

پاکستانی: کتوں کو ڈالنے کی کیا ضرورت ہے، خود کھا لینا، ایک ہی بات ہے۔

(پاکستانی فوجی، وزیر اور مولوی اسے فخر سے دیکھتے ہیں اور مسکراتے ہیں کہ ٹھیک جواب دیا)

ہندوستانی: (غصے میں کٹہرے سے نکلتے ہوئے) سالے، تو نے مجھے کتا کہا، آ جا پھر تجھے کاٹ کے بھی دکھاتا ہوں۔

پاکستانی: (آستینیں چڑھاتے ہوئے) آ جا بیٹا، جبڑوں سے پونچھ تک پھاڑ نہ دیا تو میرا نام بدل دینا۔

جج: آرڈر آرڈر، عدالت کا احترام ملحوظِ خاطر رکھا جائے۔

ہندوستانی: کیا جج صاحب، ہم بولیں تو آرڈر آرڈر، اس پاکستانی قوم کو بھی سمجھاؤ کہ اپنی اوقات میں رہے۔

پاکستانی: ابے اوئے ہندوستانی قوم، جہاں پر تیری اوقات ختم ہوتی ہے وہاں سے ہماری اوقات شروع ہوتی ہے، سمجھا؟

جج: آرڈر آرڈر، (دونوں قوموں کے نمائندوں سے) اپنی اپنی قوم کو سنبھالیں ورنہ عدالت سختی سے پیش آئے گی۔

منتری: ہماری قوم کسی سے ڈرنے والی نہیں مہاراج اور نہ ہی ہم چپ ہو کر بیٹھنے والوں میں سے ہیں۔

وزیر: ہماری قوم نے بھی کوئی چوڑیاں نہیں پہن رکھیں منتری صاحب، اینٹ کا جواب پتھر سے دیں گے۔

جج صاحب: عدالت کے احترام کو ملحوظِ خاطر رکھا جائے، سب لوگ اپنی اپنی نشست پر بیٹھ جائیں۔

(سب غصیلی انداز میں اپنی اپنی جگہ پر بیٹھ جاتے ہیں اور ہندوستانی واپس کٹہرے میں کھڑا ہو جاتا ہے)

ہیومن رائیٹس: (پاکستانی قوم سے) اتنی نفرت؟ کیا وجہ ہے اس نفرت کی؟

پاکستانی: وجہ؟ وجہ یہ ہے کہ اس ہندوستانی قوم نے پاکستان کے وجود کو کبھی تسلیم ہی نہیں کیا۔

ہندوستانی: تو کیوں تسلیم کریں ہم ایک ایسے دیش کو جو ہمارے ہندوستان کو توڑ کر بنایا گیا۔

پاکستانی: تم ساری زندگی اسی بات کو روتے رہنا، توڑ کر بنایا گیا۔ ہاں توڑا ہے ہم نے ہندوستان کو، ہم میں جرأت تھی تو ہم نے ہندوستان کو توڑا، تم میں جرأت ہے تو توڑ کے دکھاؤ پاکستان کو۔

ہندوستانی: بیٹا، ہم تو وہ حال کریں گے کہ آنے والے وقت میں تاریخ کے پنوں پر لکھا ہو گا، ایک پاکستان ہوا کرتا تھا۔

(ہندوستانی نمائندے خوش ہو جاتے ہیں)

پاکستانی: غصے سے پاگل ہو جاتا ہے اور کٹہرے سے باہر نکل آتا ہے)

حرامزادے، کمینے، میں تیرا وہ حال کروں گا کہ تاریخ میں اس بات کا ذکر تک نہیں ہو گا کہ ایک ہندوستان ہوا کرتا تھا۔

وزیر: مارو، مارو، چھوڑنا مت پاکستان کے دشمن کو۔

(ہیومن رائیٹس سامنے آ کر کھڑی ہو جاتی ہے)

جج: آرڈر آرڈر

پاکستانی: آپ سامنے سے ہٹ جائیں میڈم جی، آج اس کافر کو واصلِ جہنم کر کے رہوں گا۔

ہیومن رائیٹس: اس قوم میں 17 کروڑ سے زیادہ مسلمان بھی ہیں، کیا انہیں بھی واصلِ جہنم کرو گے؟

(پاکستانی قوم حیران نظروں سے ہیومن رائیٹس کو دیکھتا ہے، پھر سر جھکا کر واپس کٹہرے میں لوٹ جاتا ہے)

ہیومن رائیٹس: (ہندوستانی قوم سے) تمہاری کیا دشمنی ہے پاکستانی قوم سے؟

ہندوستانی: اس قوم نے اپنے دو قومی نظریئے کو بنیاد بنا کر ہمارے اکھنڈ بھارت کے دو ٹکڑے کیئے۔

ہیومن رائیٹس: اگر چھوٹا بھائی اپنے بال بچے کے لئے اپنے گھر میں ایک کمرہ علیحدہ کر لے تو کیا اسے قتل کر دیا جاتا ہے؟

ہندوستانی: (چند لمحے کے لئے سوچ میں پڑ جاتا ہے) لیکن گھر کا بٹوارا تو ہو گیا نا۔

ہیومن رائیٹس: یہ کوئی اتنا بھی بڑا جرم نہیں جسے نسل در نسل یاد رکھا جائے۔

ہندوستانی: بات صرف بٹوارے کی ہوتی تو شاید ہم اس بے وقوفی کے لئے معاف بھی کر دیتے۔ لیکن اس بٹوارے کو لے کر ہماری قوم کا جو قتلِ عام ہوا، اس کے لئے ہماری نسلیں بھی انہیں معاف نہیں کریں گی۔

پاکستانی: تو کیا تمہاری قوم نے ہماری قوم کا قتلِ عام نہیں کیا؟

ہندوستانی: آغاز تمہاری قوم نے کیا۔ ہماری قوم کو بٹوارے پر مجبور کرنے کے لئے۔

پاکستانی: ہم تو اپنا گھر بار، زمین جائیداد سب کچھ چھوڑ چھاڑ کے خانہ بدوش ہو چکے تھے، بے بسی اور لاچاری کے عالم میں پاکستان کی طرف ہجرت کر رہے تھے۔ ایک مسافر قوم کیا قتلِ عام کرے گی۔ ہم نے تو صرف بٹوارہ چاہا تھا، تا کہ دونوں قومیں تصادم کی بجائے اپنی اپنی تعلیمات اور کلچر کے مطابق زندگی بسر کریں لیکن تم اس بات کو سمجھنے کی بجائے انتقام پر اتر آئے اور ہماری قوم کا قتلِ عام شروع کر دیا۔

منتری: ہماری قوم نے اپنے پرکھوں کو کھویا ہے اور اس کے لئے ہم تمہیں کبھی معاف نہیں کریں گے۔

وزیر: ہم نے بھی اپنے اسلاف سے ہاتھ دھوئے ہیں، ہماری قوم بھی تمہیں کبھی معاف نہیں کرے گی۔

ہیومن رائیٹس: دو جذباتی قوموں کو صلح کی ترغیب دینے کی بجائے انتقام پر اکسا کر اپنی سیاست چمکا رہے ہیں آپ؟

وزیر: یہ سیاست کی نہیں اپنے اسلاف کا انتقام لینے کی بات ہے؟

منتری: انتقام تو ہم لیں گے ایک ایک قتل کا انتقام۔

ہیومن رائیٹس: کس سے لیں گے انتقام؟ جنہوں نے قتل کیئے ان کی تو ہڈیاں بھی گل چکی ہوں گی۔

(چند لمحے کی خاموشی)

منتری: ان کی اولاد سے انتقام لیں گے ہم۔

وزیر: ان کی اولاد بھی اپنے اسلاف کے قاتلوں کی اولاد سے انتقام لینے کے لئے بہت بیتاب ہے۔

جج: آرڈر آرڈر۔ بحیثیت جج، میرا کام ثبوت او شواہد کی روشنی میں فیصلہ کرنا ہے۔ لیکن یہاں میں یہ بات کہنا ضروری سمجھتا ہوں کہ دنیا کے کسی قانون میں باپ کے جرم کی سزا اس کی اولاد کو نہیں دی جاتی۔ اور جہاں تک میں جانتا ہوں تو پنڈت صاحب کے دھرم میں اور مولوی صاحب کے دین میں بھی اس بات کی اجازت نہیں ہے۔

(پنڈت اور مولوی دونوں خاموش ہو جاتے ہیں)

ہیومن رائیٹس: قتل و غارت اور آبروریزی کے ابتدائی چند واقعات کی وجہ یقیناً ہندوستان کی تقسیم کا انتقام، دولت کی لالچ یا جنسی ہوس ہوئی ہو گی لیکن اس کے بعد کے واقعات اپنے خاندان اور اپنی قوم کے تحفظ کے لئے ہوئے۔ اس طرح کے چند واقعات نے ہندوستان کی سبھی قوموں کو عدم تحفظ کا شکار بنا دیا، اس کے بعد جہاں بھی مخالف قوم کا کوئی فرد یا گروہ نظر آیا تو اپنے تحفظ کے لئے، صرف اور صرف تحفظ کے لئے اسے قتل کر دیا گیا۔ خوف کے ساتھ ساتھ انتقام کی آگ بھی بھڑک اٹھی۔ بہرحال اس قتل و غارت کی وجہ انتقام ہو، لالچ ہو یا دفاع، ہر صورت میں ساری قوموں کا ہی نقصان ہوا، ناقابلِ تلافی نقصان، اور حیرت کی بات یہ ہے کہ اتنے قتل و غارت اور لوٹ کھسوٹ کے باوجود ہر قوم خود کو ہی مظلوم سمجھتی ہے۔ یہ بھی تو ممکن ہے کہ جتنا نقصان آپ کی قوم کا ہوا ہو اس سے زیادہ نقصان آپ کی قوم نے دوسری قوم کا کیا ہو۔

مولوی: (مولوی کھڑا ہو جاتا ہے) ہمارے مذہب میں قِصاص ہے، اسلام نے ہمیں انتقام لینے کا پورا حق دیا ہے۔

ہیومن رائیٹس: اور معاف کرنے کا پورا اختیار بھی۔ اور انتقام میں بھی تجاوز کرنے سے سختی سے منع کیا گیا ہے اسلام میں، بلکہ انتقام لینے کی بجائے معاف کرنے کو فضیلت دی گئی ہے۔

مولوی: تو آپ چاہتی ہیں کہ کوئی کافر ہمارے اسلام کو برا بھلا کہے اور ہم اسے معاف کر دیں؟

ہیومن رائیٹس: ہر گز نہیں۔ اُسے سزا دیں۔ کسی کو بھی یہ حق حاصل نہیں کہ وہ دوسرے کے مذہب یا عقائد پر انگلی اٹھائے۔ لیکن جب کوئی آپ کے مذہب کی شان میں گستاخی کرے تب۔۔ ۔ لیکن یاد رہے کہ اسے سزا دینے کا اختیار صرف حکومتِ وقت کو حاصل ہے۔ مولوی صاحب، غیر مسلموں کو بھی زندہ رہنے کا اتنا ہی حق ہے جتنا مسلمانوں کو اور یہ حق انہیں اللہ نے دیا ہے، ورنہ غیر مسلموں کو پیدا نہ کرنے یا ان کو ختم کرنے پر اللہ تعالیٰ قادر ہے۔

پنڈت: (پنڈت بھی کھڑا ہو جاتا ہے) انتقام لینا ہم بھی جانتے ہیں، اور انتقام لے کر رہیں گے۔

جج: اشتعال انگیز گفتگو سے پرہیز کی جائے ورنہ عدالت سے باہر نکال دیا جائے گا۔

پنڈت: آپ ہمیں اپنی قوم کی حفاظت کرنے کے جرم میں عدالت سے باہر نکال دیں گے؟ اپنی قوم کی حفاظت کرنا کوئی جرم نہیں۔

ہیومن رائیٹس: یہی تو میں سمجھا رہی ہوں، جو کچھ ہوا وہ اپنی اپنی قوم کے تحفظ کے لئے ہوا، یا اپنے اہل و عیال کی حفاظت کی خاطر ہوا۔ جو حالات بن چکے تھے ان حالات میں ایسا ہی ہونا تھا۔ آپ کو اپنے علاوہ سب ظالم نظر آتے ہیں لیکن مجھے آپ سمیت سب مظلوم نظر آتے ہیں، ڈرے ہوئے، سہمے ہوئے، اپنے اہل و عیال کی جان بچانے کے لئے اپنے ہاتھ ان لوگوں کے خون سے رنگتے ہوئے جن کو جانتے تک نہیں۔

منتری: آپ کی من گھڑت کہانیوں سے حقیقت بدل نہیں سکتی۔ تاریخ گواہ ہے کہ مسلمان قوم نے ہندوستانی قوم کا قتلِ عام کیا۔

پاکستانی: تاریخ اس بات کی بھی گواہ ہے کہ مسلمانوں کو ہندوستان سے پاکستان لانے والی ریل گاڑیاں لاشوں سے بھری ہوتی تھیں۔ عزت لٹنے کے غم میں نڈھال نیم مردہ عورتیں، اپنے خاندان کی لاشوں میں دبے ہوئے بوڑھے، معصوم بچوں کے بے جان دھڑ اٹھائے ان کے سر ڈھونڈتی ہوئی لاچار مائیں۔

(مسلمان قوم رونے لگتا ہے، تھوڑی دیر کے لئے خاموشی طاری ہو جاتی ہے)

ہیومن رائیٹس: (ہندوستانی قوم سے) تمہاری تاریخ بتاتی ہے کہ مسلمان ظالم تھے، (پاکستانی قوم سے) اور تمہاری تاریخ بتاتی ہے کہ ہندو ظالم تھے۔ تم دونوں کی تاریخ یہ کیوں نہیں بتاتی کہ آج ہندوستان میں جو مسلمان ہیں یہ وہی مسلمان ہیں جنہوں نے تقسیم کے بعد ہندوستان کو اپنا ملک چنا۔ تمہاری تاریخ یہ کیوں نہیں بتاتی کہ آج پاکستان میں جو ہندو اور سکھ آباد ہیں یہ وہی ہندو اور سکھ ہیں جنہوں نے پاکستان کو اپنا ملک چنا۔ تمہاری تاریخ یہ کیوں نہیں بتاتی کہ تقسیم کے وقت ہندوستانی مسلمانوں کو ہندوؤں نے اپنی جان خطرے میں ڈال کر ہندوستان میں پناہ دی۔ اور پاکستانی ہندوؤں اور سکھوں کو مسلمانوں نے اپنا سب کچھ داؤ پر لگا کر پاکستان میں پناہ دی۔ تمہاری تاریخ یہ کیوں نہیں بتاتی کہ مسلمان عید کے دن اپنے ہندو پڑوسی کو اسی اپنائیت سے سویاں بھجواتے تھے جتنی اپنائیت سے اپنے مسلمان بھائی کو۔ تمہاری تاریخ یہ کیوں نہیں بتاتی کہ ہندو طبیب مسلمان مریض کا علاج بھی اسی خلوص سے کیا کرتے تھے جس خلوص سے ہندو مریض کا۔ تمہاری تاریخ یہ کیوں نہیں بتاتی کہ ہندو مسلمانوں کی جان مال کے محافظ تھے اور مسلمان ہندوؤں کے۔ مسلمانوں کو اس بات کا دکھ ہے کہ لاکھوں مسلمان مارے گئے، ہندوؤں کو اس بات کا دکھ ہے کہ لاکھوں ہندو مارے گئے، سکھوں کو اس بات کا دکھ ہے کہ لاکھوں سکھ مارے گئے لیکن تم میں سے کسی ایک کو بھی اس بات کا دکھ ہے کہ لاکھوں انسان مارے گئے؟

(کچھ لمحے خاموشی جیسے سب کو سانپ سونگھ گیا ہو)

ہیومن رائیٹس: اگر تم دونوں کی تاریخ اس قدر بھیانک ہے کہ اس میں انسان سے نفرت ہے، انتشار ہے، انتقام ہے، درگزر اور رحم نام کی کوئی چیز نہیں تو چھوڑ دو ایسی تاریخ کو اور ایک نئی تاریخ لکھو۔ تمہاری آنے والی نسلوں کو ایک ایسی تاریخ کی ضرورت ہے جس میں انسانیت ہو، امن ہو، برداشت ہو، درگزر ہو، رحم ہو۔

(ہندوستانی قوم سے)

تمہاری تاریخ مہاتما گاندھی ہے، جن کی ایک آواز پر لوگ اپنی جان تک دینے کو تیار تھے لیکن اس کے باوجود انہوں نے ہندوستانی قوم کو ہمیشہ اہنسا کا درس دیا۔ ساری زندگی تشدد سے بچنے کا عملی مظاہرہ پیش کیا۔ یہ ہے تمہاری تاریخ۔

(ہندوستانی قوم شرم سے سر جھکا لیتا ہے)

(پاکستانی قوم سے)

اور تمہاری تاریخ تو دنیا کی عظیم ترین ہستی حضرت محمد صلی اللہ علیہ و آلہ و سلم ہیں، جو رحمت اللعلمین ہیں۔ جنہوں نے مکہ فتح کرنے پر اپنے دشمنوں سے انتقام لینے کی بھرپور طاقت رکھنے کے باوجود سب کو معاف کر دیا۔ انہوں نے تو اپنے چچا کا کلیجہ چبانے والی عورت تک کو معاف کر دیا۔ یہ ہے تمہاری تاریخ۔

(مسلمان قوم شرم سے سر جھکا لیتا ہے)

(تھوڑی دیر خاموشی رہتی ہے)

جج: (گھڑی دیکھتے ہوئے) عدالت کی کاروائی 2 بجے تک کے لئے ملتوی کی جاتی ہے۔

(جج صاحب کے اٹھتے ہی سب اٹھ کے کھڑے ہو جاتے ہیں اور آپس میں باتیں کرنے لگتے ہیں۔ پاکستانی کٹہرے سے نکل کر پاکستانیوں کے پاس آ جاتا ہے اور ہندوستانی کٹہرے سے نکل کر ہندوستانیوں کے پاس آ جاتا ہے، لیکن دونوں کے چہروں سے لگ رہا ہے کہ ہیومن رائیٹس کی باتوں پر شرمندہ بھی ہیں اور فکرمند بھی)

پنڈت: (ہندوستانی فوجی سے) بھوجن کر لیں مہاراج؟

منتری: کھانے کا وقت تو ہو گیا ہے۔

ہندوستانی: (سب کو جاتا دیکھ کر) سرکار، مجھے بھی بھوک لگی ہے۔

(پنڈت ایک ششیہ کو اشارہ کر کے بلاتا ہے جس کے ہاتھ میں پوجا کی تھالی پکڑی ہوئی ہے، پنڈت اس میں سے ناریل اٹھا کر ہندوستانی کو دیتا ہے، ہندوستانی جھک کر دونوں ہاتھوں سے ناریل تھام کر ماتھے سے لگاتا ہے)

پنڈت: یہ لو بھگوان کا پرشاد، تن اور من دونوں کو شانتی ملے گی۔

(منتری سے) مہاراج، ہم تو شاکا ہاری ہیں، لیکن آپ تو مٹن کھا سکتے ہیں نا، ہم بھی مکس ویجیٹیبل رائس سے گزارہ چلا لیں گے۔

(دونوں ہنستے ہوئے نکل جاتے ہیں، ساتھ ہندوستانی فوجی بھی ہے)

(دوسری جانب)

مولوی: (وزیر سے) چلیں حضور اتنی دیر میں کھانا کھا لیتے ہیں۔

پاکستانی : (سب کو جاتا دیکھ کر) جناب، کیا مجھے بھی کھانا ملے گا؟

مولوی: کیوں نہیں کیوں نہیں، ارے میرے مریدوں میں سے کوئی ہے یہاں؟ برخوردار کو لنگر شریف لا کر دو بھئی۔

(ایک مرید ہاتھ میں روٹی جس پر چنے کی دال پڑی ہے لا کر پاکستانی کو پکڑا دیتا ہے)

سب لوگ جا چکے ہیں، عدالت خالی ہو چکی ہے، صرف ہندوستانی اور پاکستانی کھڑے ہیں۔ ہندوستانی اپنے ہاتھوں میں پکڑے ناریل کو دیکھ رہا ہے اور پاکستانی اپنے ہاتھ میں پکڑی روٹی کو۔ ہندوستانی اداسی کے عالم میں چلتا ہوا کٹہرے کے پاس پہنچ جاتا ہے اور کٹہرے کے ساتھ ٹیک لگا کر کھڑا ہو جاتا ہے۔ پاکستانی ہیومن رائیٹس کے میز پر روٹی رکھ کر وہیں بیٹھ جاتا ہے۔

کیمرہ کمرۂ عدالت کی دیوار پر لگی گھڑی پر جاتا ہے جس پر 12: 05 بج رہے ہیں۔ سوئیاں تیزی سے گھومتی ہیں اور 1: 50 پر رک جاتی ہیں۔

ہندوستانی کو کافی بھوک لگی ہوئی ہے، کچھ ہی دیر میں بھوک سے نڈھال ہو کر گر پڑتا ہے۔ پاکستانی آگے بڑھ کر اسے سہارا دیتا ہے۔ ہندوستانی کے خشک ہونٹ اور نیم مردہ آنکھیں انسانی ہمدردی کی متقاضی نظر آتی ہیں۔ پاکستانی میز پر سے اپنی روٹی اٹھاتا ہے اور نوالہ توڑ کر ہندوستانی کے منہ میں ڈالنا چاہتا ہے لیکن ہندوستانی حقارت سے منہ موڑ لیتا ہے۔

پاکستانی: کھا لے، تیرے بڑے فائیو سٹار ہوٹل سے واپسی پر تیرے لئے کچھ نہیں لانے والے۔

ہندوستانی کچھ دیر سوچنے کے بعد لقمہ منہ میں لے لیتا ہے۔ پاکستانی اس کے پاس ہی زمین پر بیٹھ جاتا ہے۔ ایک لقمہ توڑ کر ہندوستانی کے منہ میں ڈالتا ہے اور ایک لقمہ اپنے منہ میں۔

پاکستانی: (چند لقمے کھلانے کے بعد) میں تمہاری ماتا جی نہیں ہوں کہ سارا کھانا اپنے ہاتھ سے کھلاؤں گا، پکڑ اور کھا۔

(ہندوستانی مسکراتے ہوئے روٹی پکڑ لیتا ہے اور دونوں لقمے توڑ توڑ کر کھانے لگتے ہیں۔ اچانک ایک لقمہ پاکستانی کے حلق میں پھنس جاتا ہے، سانس بند ہو جاتا ہے۔ ہندوستانی فوراً اٹھ کر ادھر ادھر دیکھنے کے بعد قریب کے میز پر روٹی رکھ کر لفافے کھولنے والا چاقو اٹھاتا ہے اور ناریل میں سوراخ کر کے پاکستانی کے منہ کے ساتھ لگا دیتا ہے۔ پاکستانی ناریل پکڑ کر پانی پیتا ہے تو اس کا سانس بحال ہوتا ہے۔ سرخ آنکھوں سے بہتے آنسوؤں کے ساتھ شکرگزار نظروں سے ہندوستانی کو دیکھتا ہے)

ہندوستانی: کیا؟

پاکستانی: کمینے، مجبوری سے فائدہ اٹھا کر ایک مسلمان کو پرشاد پلا دیا؟

ہندوستانی: تو نے بھی تو ایک ہندو کو اپنی درگاہ کا لنگر کھلایا ہے۔

(دونوں مسکرانے لگتے ہیں اور دوبارہ کھانا کھانے لگتے ہیں)

پاکستانی: اچھا نہیں کیا تمہارے پنڈت نے۔ خود فائیو سٹار ہوٹل کے کھانے اور تمہارے لئے پرشاد کے نام پر یہ ناریل۔

ہندوستانی: تمہارے بڑے تو جیسے ساتھ لے گئے نا تمہیں۔

پاکستانی: میں تو غریب قوم ہوں بھئی، دال روٹی مل جائے بہت ہے۔

ہندوستانی: تمہارے نصیب میں دال روٹی اور ہمارے نصیب میں وڑا پاؤ۔

پاکستانی: وڑا پاؤ کیا ہوتا ہے؟

ہندوستانی: وڑا پاؤ ایک ایسی خوراک ہے جو پیٹ میں بھاری اور جیب پہ ہلکی ہوتی ہے۔

پاکستانی: تمہارے ہندوستانی کھانے تو بہت مشہور ہیں، ان میں سے کچھ تو ہم پاکستان میں بھی بناتے ہیں، کبھی کبھی۔

ہندوستانی: کبھی کبھی؟

پاکستانی: ہاں کبھی عید وغیرہ پر یا کبھی بچے بہت ضد کریں تب۔ (آنکھ مارتے ہوئے) یا کبھی کسی شادی پہ جانے کا موقع مل جائے تو۔ عام حالات میں تو دال روٹی پوری ہو جائے تو بڑی بات ہے۔

ہندوستانی: تمہیں کیا لگتا ہے، ہندوستان کے جو مشہور کھانے ہیں وہ ہم روز کھاتے ہیں؟ دیوالی یا ہولی وغیرہ پر ہی نصیب ہوتے ہیں، وہ بھی ہر کسی کو نہیں، یا وہ تمہارے والی بات کسی شادی ویواہ پر۔ ہاں البتہ امیر لوگ روز کھاتے ہیں۔

پاکستانی: اچھا؟ ہمارے ہاں تو امیر لوگ زیادہ تر چائینیز، اٹیلین اور کانٹیننٹل کھاتے ہیں۔

ہندوستانی: اپنی اپنی حیثیت کی بات ہے یار، ورنہ کس کا دل نہیں چاہتا کہ وہ اپنے بچوں کو اچھے اچھے کھانے کھلائے، اچھے کپڑے پہنائے، اچھے سکولوں میں پڑھائے۔

پاکستانی: (مسکراتے ہوئے) تمہارے ہاں بھی سب کچھ بچوں کے لئے ہی کیا جاتا ہے؟

ہندوستانی: اپنے لئے بچتا ہی کب ہے۔

پاکستانی: ہمارے حالات بھی کچھ ایسے ہیں۔ ساری زندگی چھوٹی چھوٹی ضرورتوں کے لئے ترستے ہوئے اس امید پر گزر جاتی ہے کہ بچے پڑھ لکھ کے کچھ بن جائیں تو شاید اپنا بڑھاپا سکون سے گزرے۔

(ہیومن رائیٹس کمرۂ عدالت میں داخل ہوتی ہے، دونوں کو باتیں کرتا دیکھ کر مسکراتے ہوئے پیچھے ہی بیٹھ جاتی ہے۔ دونوں کو اس کے آنے کی خبر نہیں ہوتی)

ہندوستانی: بچوں کو روزگار ملے تب نا۔ چناؤ کے دنوں میں سارے نیتا لمبے لمبے بھاشن دیتے ہیں، بے روزگاری ختم کریں گے، عام آدمی کو سُرکشا ملے گی، روزگار ملے گا، بچوں کو مفت اور معیاری شِکشا ملے گی، جنتا کو صحت کی ہر سہولت میسر ہو گی۔ اور چناؤ جیتنے کے بعد تو جیسے ہمیں جانتے ہی نہیں۔ تمہارے ہاں کیا ہوتا ہے؟

پاکستانی: ہمارے ہاں انتظار ہوتا ہے۔ لیڈروں کے کیئے ہوئے وعدوں کے پورا ہونے کا انتظار۔ کب بے روزگاری ختم ہو گی، کب مہنگائی کم ہو گی، کب ٹیکسز میں کمی آئے گی، کب گیس اور بجلی کے بحران پر قابو پایا جائے گا۔ کب سرکاری ہسپتالوں اور سکولوں کی حالت بہتر ہو گی۔

ہندوستانی: ہمارے ہاں بھی ایسا ہی ہے، لیکن دوش بھی تو ہمارا اپنا ہے نا بھائی، ہم لوگ ہی تو ایسے لوگوں کو ووٹ دے کر چناؤ جتواتے ہیں۔

پاکستانی: ہم نہیں چنتے، یہ ہم پر مسلط کیئے جاتے ہیں۔ اول تو عوام کا کوئی نمائندہ الیکشن میں کھڑا ہوتا ہی نہیں، اگر کوئی کھڑا ہو بھی جائے تو اسے کوئی پارٹی ٹکٹ نہیں دیتی۔ بہت زور لگایا تو آزاد امیدوار کی حیثیت سے الیکشن لڑ لیتا ہے۔ لیکن لوگ تو پارٹی کے نام پر ووٹ دیتے ہیں نا، چاہے پارٹی چلانے والے جیسے بھی ہوں۔ اور یہ جو الیکشن میں کھڑے ہوتے ہیں نا یہ عوام کے نمائندے نہیں سیاسی پارٹیز کے نمائندے ہوتے ہیں۔ بس ہمیں یقین دلا دیا جاتا ہے کہ یہ عوامی نمائندے ہیں اور ہم جمہوریت کے استحکام کے نام پر پارٹیز کے نمائندوں کو عوامی نمائندہ تسلیم کر لیتے ہیں۔ الیکشن گھوڑوں کی ریس کی طرح کا کھیل ہے، جہاں پارٹی صرف اس گھوڑے پر داؤ لگاتی ہے جس کی جیت یقینی ہو۔ اب وہ قوم کے ساتھ مخلص ہے کہ نہیں کون پرواہ کرتا ہے۔ چور ہو، ڈاکو ہو، لٹیرا ہو، سمگلر ہو، ظالم ہو، جیسا بھی ہو بس الیکشن جیتنے کی طاقت رکھتا ہو۔ ہندوستان میں کیا ہوتا ہے؟

ہندوستانی: تمہیں کیا لگتا ہے، بھرشٹاچار صرف پاکستان میں ہی ہوتا ہے؟ یہ نیتا لوگ ہمارا خون بھی اسی طرح چوستے ہیں جس طرح تمہارا۔

پاکستانی: (کچھ لمحے سوچنے کے بعد) تو پھر دشمن کون ہوا؟

ہندوستانی: (سوچ میں پڑ جاتا ہے) میں بھی یہی سوچ رہا ہوں۔

(اسی دوران ہندوستانی پنڈت اور فوجی داخل ہوتے ہیں۔ ان کے پیچھے ہندوستانی منتری اور پاکستانی وزیر آپس میں خوش گپیاں لگاتے ہوئے داخل ہوتے ہیں، ان کے پیچھے پاکستانی فوجی اور مولوی بھی ہیں۔ ہندوستانی قوم اور پاکستانی قوم کو ایک ساتھ دیکھ کر سب پریشان ہو جاتے ہیں اور غصہ بھی)

وزیر: واہ واہ واہ

(ہندوستانی اور پاکستانی گھبرا کر ایک دوسرے سے دور ہو جاتے ہیں)

وزیر: دیکھا مولوی صاحب، تھوڑی دیر کے لئے نگرانی کیا ہٹائی دشمنی دوستی میں بدل گئی۔

مولوی: بہت گھاٹے کا سودا کیا برخوردار، اس کافر کے ہاتھ سے ناریل پانی پی کر خود کو جامِ کوثر سے محروم کر دیا تم نے۔

پنڈت: (ہندوستانی سے) مورکھ، ایک تو مسلے کی روٹی کھائی اس پہ بھگوان کا پرشاد بھی دے دیا؟ نرک میں جائے گا تو، نرک میں۔

ہندوستانی: کسی انسان کی جان بچانے سے کوئی نرک میں جاتا ہے مہاراج؟

پنڈت: ہاں، جاتا ہے، اگر وہ کوئی مسلا ہو تو، (حقارت سے) اوپر سے پاکستانی بھی۔

مولوی: سن لیا؟ بھگوان کا پرشاد ملا ہے جناب کو، تب تو میدانِ حشر میں ان کی مغفرت کے لئے بھگوان کو ہی آنا پڑے گا۔

پاکستانی: مولوی صاحب میرے حلق میں لقمہ اٹک گیا تھا، اس کے علاوہ اور کوئی چارہ نہیں تھا۔

مولوی: ایمان کامل ہونا چاہیئے، جو پروردگار لقمہ اٹکا سکتا ہے وہ لقمہ حلق سے اتار بھی سکتا ہے۔

All rise کی صدا کے ساتھ ہی جج صاحب عدالت میں داخل ہوتے ہیں، سب لوگ کھڑے ہو جاتے ہیں۔ جج اپنی سیٹ پر بیٹھ جاتا ہے۔ پاکستانی قوم اور ہندوستانی قوم اپنے اپنے کٹہرے میں پہنچ جاتے ہیں۔ ہیومن رائیٹس پیچھے سے اٹھ کر آگے جج کے روبرو آ جاتی ہے۔

جج: عدالت کی کاروائی شروع کی جائے۔

ہیومن رائیٹس: مائی لارڈ، ہم سب نے دیکھا کہ دونوں قوموں میں ایک دوسرے کے لئے کتنی نفرت بھری ہوئی ہے۔ اور افسوس ناک بات یہ ہے کہ دونوں طرف کی حکومتیں اور مذہبی رہنما دونوں قوموں کو اکسانے میں لگے ہوئے ہیں۔ ان دونوں قوموں پر افسوس ہوتا ہے کہ یہ اپنے اور آنے والی نسلوں کے مستقبل کی فکر کرنے کی بجائے اپنے اپنے ماضی کا سوگ منا رہے ہیں۔

(پاکستانی اور ہندوستانی قومیں شرم سے سر جھکا لیتی ہیں)

یا شاید انہیں مستقبل کی فکر سے دور رکھنے کے لئے ماضی سے باہر آنے ہی نہیں دیا گیا۔

(ہندوستانی اور پاکستانی حکومتوں کی طرف دیکھتے ہوئے)

مستقبل کی فکر سیاسی شعور بیدار کرے گی، سیاسی شعور آ گیا تو ملک کی بھاگ دوڑ سنبھالنے کے لئے عوام یا جنتا کی طرف سے قیادت کے انتخاب کا معیار بھی رکھا جائے گا۔ معیار پر پورے نہ اتر سکے تو سیاست تو گئی ہاتھ سے۔

(پاکستانی وزیر اور ہندوستانی منتری ایک دوسرے کی طرف پریشان کن نظروں سے دیکھتے ہیں)

ہیومن رائیٹس: (جج کی طرف مڑتی ہے) مائی لارڈ۔ میں ہندوستان اور پاکستان کے سیاستدانوں کو کٹہرے میں بلانے کی اجازت چاہتی ہوں۔

جج: اجازت ہے۔

(ہیومن رائیٹس ہندوستانی عوام کو پاکستانی عوام والے کٹہرے میں جانے کا اشارہ کرتی ہے، ہندوستانی قوم پاکستانی قوم کے کٹہرے میں آ کھڑا ہوتا ہے اور ہندوستان اور پاکستان کی حکومتیں خالی کٹہرے میں کھڑی ہو جاتی ہیں)

ہیومن رائیٹس: (ہندوستانی حکومت سے) آپ نے چناؤ سے پہلے ہندوستانی قوم کو وچن دیا تھا کہ آپ کی سرکار بننے کے بعد آپ اپنی جنتا کو روزگار دیں گے، صحت کی سہولیات دینے کے لئے ہسپتال اور گراؤنڈز بنائیں گے، مفت اور معیاری تعلیم مہیا کریں گے۔ مہنگائی پر قابو پائیں گے، ایک عام ناگرک کا معیارِ زندگی بلند کریں گے۔ لیکن آپ کی سرکار بننے کے بعد ایسا کچھ بھی نہیں ہوا، کیوں؟

منتری: آپ جانتی ہیں کہ ہندوستان کی آبادی کتنی ہے؟ اتنی بڑی آبادی والے ملک میں سہولیات مہیا کرنے میں وقت لگتا ہے۔

ہیومن رائیٹس: جی ہندوستان کی آبادی واقعی زیادہ ہے، اس لئے آپ کی حکومت کو ٹیکس بھی زیادہ ملتا ہے۔ اگر وہ ٹیکس آپ کے سوئس بینکوں کے اکاؤنٹس میں جانے کی بجائے عوام کے فلاح و بہبود کے لئے خرچ ہو تو آپ جانتے ہیں کہ آپ کی کرنسی کی ویلیو موجودہ ویلیو سے ڈبل یا شاید اس سے بھی زیادہ ہو سکتی ہے۔

منتری: الزام لگانا تو آپ لوگوں کی عادت ہی بن چکا ہے، پاکستان کی طرح۔ اگر کوئی ثبوت ہے آپ کے پاس تو بات کو آگے بڑھائیے گا۔

ہیومن رائیٹس: ثبوت تو آپ کے چہرے سے پسینہ بن کر ٹپک رہا ہے منتری مہودے۔

(ہندوستانی منتری فوراً رو مال نکال کر اپنا پسینہ خشک کرتا ہے)

ہیومن رائیٹس: (ہندوستانی قوم سے) آپ کے منتری تو بتا نہیں پائے، آپ ہی کچھ بتا دیں عدالت کو۔ آپ کی قوم کی تقدیر بدلنے کے لئے کیا کرتی چلی آ رہی ہیں آپ کی حکومتیں؟

(ہندوستانی گھبرا جاتا ہے)

ہیومن رائیٹس: آج تمہیں کسی معقول پلیٹ فارم پر بولنے کا موقع ملا ہے، اگر آج بھی نہ بول سکے تو ایک مہربانی کرنا، آج کے بعد ہندوستانی قوم کی حالتِ زار کا ذمہ دار کسی بھی حکومت کو مت ٹھہرانا۔

(ہندوستانی قوم چند لمحے خاموش رہنے کے بعد بولنے کی ہمت کرتا ہے)

ہندوستانی: کچھ بھی نہیں ہوا۔ غریب آج بھی ترستی ہوئے زندگی گزارنے کے بعد بہت سی حسرتیں دل میں لئے بے بسی کی موت مر جاتا ہے۔ مہنگائی کا یہ عالم ہے کہ ہندوستان کی آدھی سے زیادہ آبادی اپنے بچوں کے لئے پھل نہیں خرید سکتی، چارٹ پر بنے پھلوں کی تصویریں دکھا کر A for Apple اور B for Banana سکھاتی ہے۔ روزگار؟ ہونہہ، ہماری مائیں اور بیویاں ان امیر زادوں کے گھروں پر کام کرتی ہیں، ان کا بچا ہوا کھانا لا کر اپنے بچوں کا پیٹ بھرتی ہیں اور جب ہم روزگار کے لئے در در کی ٹھوکریں کھانے کے بعد واپس گھر آتے ہیں تو وہی کھانا۔۔ ۔ بھگوان کی سوگند کھانے کو دل نہیں کرتا۔ ہماری ماں یا ہماری بیوی بے بسی اور لاچاری میں لپٹا ہوا لقمہ ہمارے منہ میں ڈال کر کہتی ہیں، چنتا مت کرو، کل کوئی نہ کوئی روزگار ضرور مل جائے گا، پھر ہم اپنا خود کا کھانا بنا کر کھائیں گے۔

(ہندوستانی رونے لگتا ہے، پاکستانی آنکھوں میں آنسو لئے ہندوستانی کو اپنے سینے سے لگا لیتا ہے اور ہندوستانی اس سے لپٹ کر روتا ہے۔ اس دوران عدالت میں اس کے رونے کے علاوہ کوئی آواز سنائی نہیں دیتی)

(پاکستانی ہندوستانی کو حوصلہ دیتا ہے اور ہندوستانی چپ ہو کر اپنی آنکھیں پونچھتا ہے)

ہیومن رائیٹس: (پاکستانی وزیر سے) کچھ ایسے ہی وعدے آپ نے بھی الیکشن سے پہلے اپنی عوام سے کیئے تھے، کوئی ایک وعدہ بھی پورا نہیں ہو سکا۔ کیوں؟

وزیر: میرا خیال ہے کہ یہ مقدمہ ہندوستانی اور پاکستانی قوم کے درمیان ہے نہ کہ دونوں ملکوں کی حکومتوں کے درمیان۔

ہیومن رائیٹس: آپ کی سٹیٹمنٹ اس بات کی ترجمانی کر رہی ہے کہ آپ حکومت اور عوام کو الگ الگ سمجھتے ہیں۔

وزیر: مائی لارڈ، پاکستان میں ہڑتالوں اور دھرنوں کے بعد میرے سیاسی مخالفین کی یہ ایک نئی چال ہے، (ہیومن رائیٹس سے) کتنے پیسے دیئے ہیں انہوں نے آپ کو ہماری حکومت کے خلاف پروپیگنڈا کھڑا کرنے کے لئے؟

ہیومن رائیٹس: پاکستانی قوم سے لوٹے گئے جتنے پیسے آپ کے سوئس بینکوں میں پڑے ہیں ان کے مقابلے میں تو بہت کم۔

وزیر: آپ مجھے اور میری حکومت کو بدنام کرنے کی کوشش کر رہی ہیں۔

ہیومن رائیٹس: چلیں کوئی بات نہیں، آپ جواب نہیں دینا چاہتے تو نہ دیں، میں آپ کی قوم سے پوچھ لیتی ہوں۔ (پاکستانی قوم سے) تم بتاؤ، الیکشن سے پہلے کیئے گئے کتنے وعدے پورے کیئے حکومت نے؟

(پاکستانی قوم وزیر کی طرف گھبرائی ہوئی نظروں سے دیکھتا ہے)

ہیومن رائیٹس: کیا مہنگائی میں کمی ہوئی؟